O Logie Kirk amang the braes,
I'm thinkin' o' the merry days
Afore I trod thae weary ways
That led me far frae Logie!
Fine do I mind when I was young
Abune thy graves the mavis sung
An' ilka birdie had a tongue
To ca' me back to Logie.
O Logie Kirk, tho' aye the same
The burn sings ae remembered name,
There's ne'er a voice to cry "Come hame
To bonnie Bess at Logie!"
Far, far awa' the years decline
That took the lassie wha was mine
An' laid her sleepin' lang, lang syne
Amang the braes at Logie.
Logie Kirk
Violet Jacob
(1)
Poem topics: voice, tongue, young, mind, merry, Print This Poem , Rhyme Scheme
Submit Spanish Translation
Submit German Translation
Submit French Translation
Write your comment about Logie Kirk poem by Violet Jacob
Best Poems of Violet Jacob