Umntu obhinqileyo ityantyambo
ebukekayo.
Imbewu enomtsalane ne thandekayo.
Isihlobisi somzi esincomekayo
Umlisela nomthinjana ikamva eliqhakaziyo
Intsana abaphathi bobukumkani bamazulu.
Bakhona kumqulu waphezulu kuba wenjenjalo ubathanda uQamata.
Ihlabathi liyanda liyaqhama phantsi kwegama lebhinqa.
Emakhaya kunuka uthanda kuphithizela imvano ngenxa yamakhosikazi.
Oonobangela boxolo, inzolo nongcwangco.
Nam bendibalisa imbali ngoba akusenjalo.
Ubomi yimozuli ngenene buyaguquka inene.
Ngoba ndibona amanene sele ezizilwanyane.
Imijelo yamanzi ingcweli gazi
Izidlele ngumfula wenyembezi.
Kuphefuma Isono soMfazi
Ndiyafacisa nam andazi.
Aphila ubomi bentshontsho amakhosikazi.
Thyini! Banqabe okwemvula yasebusika abaseThyini.
Intsana zenza iincwina nezijwili azinanina
Aphela Amanina omzi waseAfrika.
Bayabhukruzwa okwehagu ezityi ntsimi
Bayaqhekezwa okwe komtyii zomlungu
Bayaqwegwa okwabazingeli endle
Bayaxhelwa okwebhokhwe zamasiko
Bayatshiswa okwempahla endala
Bayadlwengulwa bangamaxhoba okuxhatshazwa ngamaxhalanga.
Amantombazana aphila nedyudyu
Boyika isandyondyo ezivele sithi dyulukudu sokufa.
Liyintoni ikamva lesisizwe?
Xa kubhanga ityantyambo.
KoQhama bani xa kuphangwa imilisela.
Madibuyeleni kuNdalashe apho Amanina ebebukwa.
Masijike sijonge phaya mandulo apho owasethyini ebephathwa okweqanda
MzikaPhalo eyonakeleyo iyalungiswa.
Yhini maDuna sixoleleni.
Ndizityanda igila ndiyazithoba egameni labantu lamanina
Bayaphi uBuntu kuLuntu?
Izazela zifile abantu bangamaxholovane
Mandiguqe ndiphe amandolo ukutya kwawo.
Ndakhe umkhanyo ndijonge phezulu kuBawo
Ngumqali nomgqibelelisi wobomi lowo
Mvelingqangi sikhumbule
Hlisa liso lakho usikhangele
Sisizukulwana sakho owawusithandile.
Emadabini amaninzi usonyule.
Kwinzunguzi ezimnyama usiwezile
Kwimisinga enamandla utsibisile.
Sibambe ngesandla usikhusele ngoba unguSomandla
Musa Maliwa.
Peace .
Isikhalo Samanina
Musa Maliwa
(1)
Poem topics: peace, Print This Poem , Rhyme Scheme
Submit Spanish Translation
Submit German Translation
Submit French Translation
Previous Poem
Our Normal Poem>>
Write your comment about Isikhalo Samanina poem by Musa Maliwa
Best Poems of Musa Maliwa