Ang akon amay, Isa gid ka maayo nga tawo
Mabuot, mapisan kag sa pagpangabuhi tama gid kapursigido
Sya gid isa ka mabinuligon kag tampad nga tawo
Indi lang sa amon kundi pati man sa iya mga amigo.
Gani akon gid mahambal, si tatay amon gid modelo
Kay si tatay sa amon, nangin isa gid ka maayo nga ehemplo

Si tatay, isa gid ka mapag-on nga haligi sang amon puluy-an,
Mapinalanggaon nga bana kag amay sa iya mga kabataan,
Sa problema sya gid imo madalaganan,
Bisan anu pa na si tatay wala gid sang ginaatrasan,
Handa gid permi sa pagbulig bisan kay sin-o man.

Akon madumduman sang kame gagmay pa
pagpuli halin sa eskwela kame iya ginapakanta
Bahay kubo, sitsiritsit kag leron leron sinta
sa pagkanta, baw! Kame gid gapauna-una
Kay bal-an namon pagkatapos may premyo gid nga lima.

Isa man sa indi ko gid malimtan
Nga sang ako nagaintra sa mga hinampang sa amon eskwelahan,
Si tatay gid Ang akon number 1 fan ilabi na gid kon ako nagadalagan.
Permi nya gid ako ginasuportahan kag Wala ginpabay-an.
Gani wala gid ako ginakulbaan kay bal-an ko nga ara sya nga akon makapyutan,
bisan anu pa akon madangtan, kadalag-an man o kapaslawan

Daw sang san-o Lang tatay sang kita updanay,
Kame imo pa ginatudluan karate kag taekwando sa sagwa balay,
Kag ginapasumbag sa sako nga may sulod nga paray,
Pero subong pila na gali katuig nga indi ka namon upod day nanay
Kay ngaa tay? Temprano ka pa ya imo nagpahuway?

Sang ara ka tay,
Aton pangabuhi tama gid katawhay.
Sa imo ubra, ikaw halos Indi na magpahuway
Tungod imo gid handom kag kalipay
Nga kame imo matagaan sang kabuhi nga masulhay.

Tay, Indi ka man namon kaupod karon
Pero ikaw gid sa gihapon, Palangga namon
Magapabilin sa amon panghunahuna kag tagipusoon.
Kag lauman mo tay, nga ang tanan mo nga handom para sa amon
Amon gid ina tanan lab-uton.