I Am My Mammy's Ae Bairn.

Tune - "I'm o'er young to marry yet."


I.

I am my mammy's ae bairn,
Wi' unco folk I weary, Sir;
And lying in a man's bed,
I'm fley'd it make me eerie, Sir.
I'm o'er young to marry yet;
I'm o'er young to marry yet;
I'm o'er young, 'twad be a sin
To tak' me frae my mammy yet.

II.

Hallowmas is come and gane,
The nights are lang in winter, Sir;
And you an' I in ae bed,
In trouth, I dare na venture, Sir.

III.

Fu' loud and shrill the frosty wind,
Blaws through the leafless timmer, Sir;
But, if ye come this gate again,
I'll aulder be gin simmer, Sir.
I'm o'er young to marry yet;
I'm o'er young to marry yet;
I'm o'er young, 'twad be a sin
To tak me frae my mammy yet.