Tune - "Jumpin' John."
I.
Her daddie forbad, her minnie forbad;
Forbidden she wadna be:
She wadna trow't, the browst she brew'd
Wad taste sae bitterlie.
The lang lad they ca' jumpin' John
Beguiled the bonnie lassie,
The lang lad they ca' Jumpin' John
Beguiled the bonnie lassie.
II.
A cow and a cauf, a yowe and a hauf,
And thretty gude shillin's and three;
A vera gude tocher, a cotter-man's dochter,
The lass wi' the bonnie black e'e.
The lang lad they ca' Jumpin' John
Beguiled the bonnie lassie,
The lang lad they ca' Jumpin' John
Beguiled the bonnie lassie.